Why do you push me to join a team? To choose a believe over another? Why should we fight at all?
كتبت قبل كدة وبتكلم كتير عن البين بين وان مشكلة كبيرة من مشاكلي اني مش بعرف اقتنع او اعتنق اعتقاد ما زي ما الناس بتعمل بل بالعكس بستغرب من قدرتهم دايما على التصريح بميولهم او جماعة منتميين ليها.
في الحقيقة لفظة انا إسلامي سني علماني اشتراكي يساري لا ديني حتى ولو ملحد دي كلها مسميات تقيلة جدا على عقلي أنه يتقبل حاجة فيهم تكون كاملة متكاملة كدة بتعتبر عني. يعني ماشي فيا من كل حاجة شوية وقد اكون بميل لطرف عن الآخر لكن لو هتقارن بالناس والمجتمع هلاقي ان الأغلب معارضة دائما على أي قالب بتحط فيه.
متحطنيش في قالب!
سبب من ضمن الأسباب إني بصدق جدا! وانتم مش بتعملوا باللي بتقولوا عليه. فلما حد هيقولي انه علماني بتوقع حاجات وبلاقي حاجات مختلفة عندك فببقى ف حالة غير متزنة. كذلك الإسلاميين.
وعشان مبحبش فعل الكذب بشكل عام ممكن أكون بخاف اقول انتماء ما ليا عشان مخذلش اللي قدامي. بس حتى لو يعني إيه المشكلة! لا ضرر ولا ضرار خالص!
المجتمع بيدفعنا دايما أننا نختار قالب وإلا نكون مذبذبين ومشوهين او منبوذين او حتى يعني معندناش رأي ولكن كل دة مش صحيح. كلنا فينا من كل الصفات دي شوية. وشوية بشوية نتيجة المثالية الزائفة اللي بتدعوا ليها بتحول المعتقدات لمسوخ ملهاش علاقة بالواقع. وبعيدة كل البعد عننا عن يومنا وتعاملاتنا.
فيعني حبيت اقول اد ايه بكره الدفع والسباق اللي بتتسابقوا فيه دة ونفسي بس اخرج منه وبحاول.
