أوائل الحاجات

في العادي يعني الناس بتستمتع ببدايات أي شيء. أول مرة في أي فعل ليها تأثير مختلف. بس أنا فيا عادة منيلة إني بكُر النهاية بدري بدري. مش بعرف استمتع بالبدايات زي ما بسمع عنها. بس بقدّر الاستمرارية جدا. الاستمرارية بالنسبالي بتمثل مصداقية أكبر زي التأكيد إني فعلا بحب الحاجات دي. مش ناس كتير بتفهم دة. أحسن إحساس حسيته في يوم ومش بنساه كنت رايحة أول شغل اشتغلت فيه في يوم من ذات الأيام الشتوية بس اللي بتبقا طالع فيها شمس رغم الجو العام. بحس الشمس بتقاوح كدة وبتكون حنونة ودافية. وكان نص وشي جاي عليه شمس والنص التاني جايله هوا ساقع ففعليا كنت حاسة وشي نصه دافي جدا والشمس بتحنو عليه برغم ان النص التاني سقعان بس في المجمل كان احساس جميل جدا. لحد دلوقت ومن زمان بحب الايام الشتوية اللي طالع فيها شمس حلوة عن أي وقت تاني في السنة. واتمنى اني في كل شتا أحس نفس الإحساس تاني⁦❤️⁩ واتمنى ان الايام تثبتلي إني لسة بحب الحاجات واني متغيرتش ولا بقيت بخاف وبكش.