مشاهد

عن أبو مناخير مقطوعة
ومدمن شاي
وعجوز تزورنا هاتفيا ونزورها خطأيا

عن أبو مناخير مقطوعة :
طيب أكيد مبدئيا إتقطعت ف حادثة , خناقة , ضربة مطوة , أو حتى شباك قفل علي مناخيره ! , أو باب !!!
طيب ايه احساسه وهي مناخيره كدة ناقصة " حتة " , طيب هو مهم أوي تكون مناخيرك كاملة ؟
مش عارفة , بس حاساه إحساس غريب كدة ومريب , ازاي يعني الراجل دة عايش كدة !- سبحان الله - وهو سكت عن قطعة مناخيره ؟ طيب أخد تعويض من حد " علي إعتبار إن حد قطعهاله " ,, طيب هل لو شباك أو باب قفلوا فعلا علي مناخيره , هل هو كره المكان دة ؟
احساسه ازاي ؟!

مدمن شاي :

الراجل دة فعلا يُثير تساؤلات كثيرة جدا في مُخيلتي , بيحب الشاي بغباء , دايما ماشي بازازة كدة بلاستيك مليانة شاي علي اخرها , ويشرب شاي , المشكلة ف إنه فعلا بيتسطل !!! إدمانه للشاي غريب , وبيحبه حِبر , باين من لونه , بس مدوقتش منه عشان أعرف بيحبه بسكر ولا من غير , بس أعتقد كييفي الشاي والقهوة مش بيحبوا سكر كتير لو أصحاب مزاج عالي أوي يعني ,
باستغرب فعلا من الشاي دة . كنت لفترة متخيلة إنه مفهم الناس انه شاي وحاطط فيه حاجة تانيه يشربها , بس زاد تعجبي لما كله بيأكد إنه فعلا شاي !!

عجوز تزورنا هاتفيا ونزورها خطأيا :

الغريب في الأمر , إن العجوز هي اللي بتتصل دايما ودايما نقولها " النمرة غلط " , كل مرة تطلب ساره , بس النمرة فعلا غلط , في رمضان , عيد الفطر , عيد الأضحى , وكل فترة كدة بقا تتصل , " النمرة غلط يا حجة " , معلش يابني , معلش يا بنتي , كل سنة وانتِ طيبة يا حجة ,,
مرة ماما ترد , وانتِ يا حجة كويسة , طيب مش عايزة حاجة ابعت اجبهالك ؟
الوضع تطور لدرجة إنها بقت تتصل تسأل لمجرد إنها زهقانة وعايزة تدردش مع حد أو تسأل علينا أو أو أو أو

وعرفنا إنها ساكنة قريب , وابنها الوحيد نمرته مختلفة عن نمرتنا برقم ,,, عايشة لوحدها , بتتصل بابنها عشان تسأل علي أحفادها , محدش بيسأل عليها , مريضة , جيرانها كويسين معاها ,, وتفاصيل من ذلك القبيل وحواديت كتير
اللي يدعو للتساؤل بقا , إزاي هي مش خايفة علي نفسها وهي قاعدة لوحدها كدة وآمنت لينا وحكت حاجات كتير عنها , مخافتش !!
بس الواحد لما بيوصل للسن دة ممكن يكون خلاص بقا مش بيخاف علي نفسه حتى!! - ممكن -

ممكن كمان الوحدة تخلي اي حد يدور علي ناس حوليه يحكيلها وتسأل عنه ويسأل عنهم -جايز - 

وأنا والمكان  مليان بناس :)

 والصورة متاخدة من هنا