29 اكتوبر بداية انكشاف الاحداث!

أنا قولت ألحق نفسي في الشعور دة عشان بنساه كتير
أنا مبسوطة إني بتواجد وقت ما أي حد بيكون محتاج .. حتى لو مجرد واحد عنده فراغ لحظي وبيحاول يملاه بيا سَد خانة .. أنا ممتنة إني شخص مناسب لدة وبحس ان ربنا بيستعملني كدة في حاجة كويسة مش وحشة لأني مش بأذي حد ولا بعلّق حد بيا واخلى بيه .. فبالتالي آي كان هاندل ذات
في الأحيان الكتير التانية بكون متضايقة من دة جدًا لأني بحس إنه بيتم إستغلالي .. بس أنا مش عاوزة أفتكر دة حاليًا ولا أكتب عنه أكتر ..
المهم إني كمان مدركة إن عندي ذكريات ..

اعتقد إن أكبر أحداثي "هو" اللي مر ف حياتي زي السحابة .. بالهدوء و المطر و الرياح والزعابيب .. والحب ..
كان حلو
تقريبا كمِّلي الجدول .. خبرة اضافت لجدول مشاعري وتجاربي أكيد
أنا ممتنة

من اللحظات اللطيفة إنك تُدرك إن ليك ذكريات بكل تفاصيلها البسيطة والصغيرة أسعدتك أو حتى احزنتك فكوّنت ما أنت عليه الآن بشكل أو بآخر .. بعض المواقف مكملش أكتر من دقيقة

نظرة حد ف موقف معين بعد فرحة- حزن- اندهاش- توتر وقلق ... وحاجات كتير ممكن مفيش كلمات تُعبِّر عنها ..

بس بنقول!

قصص تُروى وقصص لم ولن تُروى شكرا لكل حد عملّي حاجة وانا لسة فاكراها بالخير

وشكرا لكل شخص سمحلي اكون ف جزء من حياته ولو جزء بسيط

معرفش ان كنت اثرت في حد او لأ ومش عارفة مدى التأثير دة

بس انا مبسوطة ان عندي رواية لحياتي وكلها احداث مش بس ملل ولا ليلي زي نهاري ونهاري زي ليلي ولا من سنة زي النهاردة ولا اي وقت كنت فيه زي اي وقت تاني

اينعم معنديش افضل مرحلة ف حياتي ولا افضل شعور حسيته .. ولا اسوأ مرحلة ف حياتي .. لأ الحقيقة دي عندي وعندي كمان اسوأ موقف بس مش عايزة اكتب عنهم هنا .. هنا هيكون "الهابي بارت" اوف ماي لايف لو حصل وكملت اللي بعمله دة .. ممكن تلاقي نفس الحدث متكرر في الهابي بارت والساد بارت .. لأن الحقيقة هي كل موقف له وشين حلو ووحش .. الامور لا تستوي إلا هكذا .. مش عارفة لسة هكتب عن اشخاص واقسمهم ولا عن احداث ... فيه أشخاص كانوا مؤثرين فعلا ودول اشخاص اساسية ممكن اتكلم عنهم لوحدهم .. واضيف جزء الاحداث بتسلسل زمني لسني .. لسة مش متأكدة