عن الخنقة و كلام فاضي

طيب ونقول بسم الله :)
أقوال مشهورة :
" مش لاقية حد يفهمني "
" خايفة م الوِحدة "
" أنا مجنونة جدا "
_________________________________________________________________________
أنا بقا مش " مش لاقية حد يفهمني " , هو أنا بصراحة مش بدوّر علي حد يفهمني أصلاً , ومع ثقتي التامة إن الناس اللي فاهمين إنهم فاهمني فهم مش فاهمني خااااااااااااااااااااالص , مش بحاول أصلّح لهم مفهومهم عني , مليش دعوة , هما فهموا كدة ! بس خلاص
عشان كدة كل واحد يقولي حاجة "إنتِ سياسية , ثورية , عصبية , طيبة , رقيقة !!!! , جدعة , سوسة , هبلة , وما خفي كان أعظم "
كلهم غلط !
ومش عايزة حد يعرف طبيعة شخصيتي لأن أساسا أنا مُتقلّبة ودي الحاجة اللي أنا مصرحة لنفسي إني أقولها يعني وعادي الناس لو فهمت دي بمزاجها ,,,,


أنا بقا مش خايفة م الوحدة , وليــــــــــــــــه كدة !!!
هنحكي من الآخر للأول :
" أسماء وإسراء " جيراني , هيعزلوا , أصلا الناس دي يوم ما بالليل أوي و خلاص بقا قفلت معايا عايزة ألوك مع حد أو أحكي حاجة بطلعلهم أو هما ينزلوا , كدة يعني وفي الصيف والسطوح و الحواديت والقمر والليل والخسوف
طيب ولما هيعزلوا بقا ! أنا هكلم نفسي " قال يعني مش بكلم نفسي " , بس أنا أقصد الوضع هيتطور إزاي !
وبعدين هخاف إزاي من الوحدة وأنا أساسا ف وحدة ! وخلاص تأقلمت , كلميني كدة يا روان عن " الصحاب " , فكرة الصحاب نفسها بقت فكرة سخيفة جدا عندي ! , طيب عن " الاخوات " , عندي 2 صبيان زي الفل بنغلس علي بعض ليل ونهار , طيب ولو عايزة تحكي بقا ! , مفيش غير الكتابة والمسح والحرق وتقطيع الورق ورميه في الزبالة ! هو دة مثوى " كل " حاجة عايزة أحكيها لأي حد لحد ما بقيت مش بحكي عشان خلاص ما أنا عارفة مصير كلامي !
ويجي حد بكل سخافة يقول " ...................." مش هكتبه عشان مش عايزة أفتكره كتير !


نيجي للجنان , فكل واحد مجنون بطريقته , قولي مفهومك عن الجنان عشان أقولك أنا مجنونة بالنسبة ليك ولا لأ !
تكرار كلمة أنا مجنون/ة بقا سخيف لدرجة مش بحب أرد علي الشخص اللي بيقول كدة في النقطة دي ! أكنه قال هوا ! بس كدة


_________________________________________________________
برضه لسه مخنوقة ! وبعدين طيب !!!
_________________________________________________________
وكان فاصل ورجعت مخنوقة برضه ! الموضوع متغيرش !
طيب هنقول إني مبحبش حد يخصني بحاجة غير لو كان هو أصلا له معزة عندي , بس دة ميمنعش اني مش بحب أكون منسية , عشان أنا مش بنسى حد ! أنا فعلا مش بنسى حد , حتى الناس من KG1 لسه فاكراهم ولسه فاكرة أول يوم ليّا ف KG2 , لما فضلت قاعدة في الفصل " الجديد " ودوّرت علي هدير وجهاد وفاطمة , ويومها ملقتش غير جهاد و هدير مجتش , بس جت تاني يوم وروحت قعدت جنب جهاد وجت بعد كدة هدير اتنقلت جنبنا !!!! , حتى هما نفسهم مش فاكريني شخصيا , بس أنا فاكرة !
وفاكرة أول مرة تجيلي فيها إمساك , " يومها كنت لابسة بنطلون استرتش اسود و تي شيرت أصفر " " بكره اللون دة "
بس يومها في الأول فضلت داخلة طالعة داخلة طالعة ع الحمام , بعد كدة قولت لبابا , أنا عايزة أعمل بي بي بس مش عارفة ,
ويومها قالي عندك إمساك , وروحت لماما قالتلي من كتر أكل الجوافة " بحبها جدا , بس دلوقتي مبقاش ليها طعم " وبعدين قالتلي اشربي لبن ساقع " وأنا مش بحب اللبن أصلا " , فقالتلي خلاص اصبري شوية وهتعرفي تعملي :D
ودخلت قررت هقعد لحد ما أتصرف , ويومها بابا دخل ينام و جارتنا خبطت علينا " هالة , زوجها مات و عزلت من عندنا ومبقتش بشوفها دلوقتي , بس زوجها هو اللي حببني في السمك وجابلي كتاب عن السمك لسه عندنا , ومرة جابلنا سمك هدية  :) الله يرحمه "
المهم إن طنط خبطت وماما وقفت معاها شوية علي الباب , وأنا فضلت أفكر , طيب هو أنا ممكن معرفش أعمل تاني ؟ طيب هعمل ايه بعد كدة عشان الامساك اللي بيقولوا عليه دة ميجيليش تاني ؟ ويومها إتضايقت من تفكيري دة , وإني مش عارفة أتصرف , ففضلت أبص علي السيراميك وألوانه وأتخيل الأشكال اللي بحبها " كالعادة " , لحد ما الامساك إتفك , وفضلت بقا , ياماااااااااااااااامااااااااااا أخيييييييييييييييرا عملت , وفضلت أقول " نزلت نزلت نزلت نزلت " بصوت عالي وصريخ وفرحة عارمة طبعا الفضول كان وصل لقمته عند جارتنا وطبعا ماما متتوصاش حكتلها عن الإمساك اللي كان عندي من الصبح ,,,


يادي القرف ! إيه الذكريات المقرفة دي !!!!!!
المهم نرجع لمرجوعنا , " أنا مش بنسى "
ماشي النسيان من طبيعة الانسان ولازم نعذر الناس ومشاغل الدنيا وكدة , بس متوصلش لدرجة " الإهمال " كمان !!
شكــــرا ,
ببقا بقولها وأنا من جوايا عايزة أضرب اللي قدامي وببقا بعيط عياط رهيب من جوايا


________________________________________
ماشي نتكلم عن العياط عندي :D
أنا أصلا أنانية
المهم إن العياط عندي الأغبياء يعتقدونه" ضعف" , والأذكياء يعتقدونه " قلة حيلة " , واللي بينهم يفكروه " رومانسية "
بس هو بالنسبالي مش كدة , لما بتظلم " فقط " بعيط بدموع , غير كدة بعيط عياط أكتر بس من غير دموع ! هو مجرد مش بعرف أنطق , وخنقة رهيبة في الحلق !
ببساطة أكتر مش بعيط بدموع غير في المواقف "المنطقية "
يعني نتيجة ! موقف ظلم ! حاجات لو عيطت بدموع محدش هيلومني يعني ولا يفضل مالك ويقرفني بقا !


بس أنا فعلا نكدية علي فكرة !
ولكن مش محبطة , ولا متشائمة , ___ دي بتتقالي كتير , بس أنا إتعودت , بس أنا يمكن عندي بُعد نظر شوية وف أغلب الاوقات بتكون وجهة نظري صح! مما يجعل الأمور أكثر كآبة !! ,
المهم بقا إني ممكن أعيط عشان حاجة تافهة , الجدير بالذكر إن الناس فيه حاجات عندها تافهة جدا وبتكون عندي الأهم !


____________________________________________________
طيب نكتفي بهذا القدر لهذا اليوم 5\2012\5     1:27am