إشاره مرور لحياتك وإنت الحَكم .. ظابط ضعيف مستخبي ف كشك أضعف منك - ظناً منك إنه بيحميك م الشمس والمطر - وكيس شيبسي صغنن مبيخلصش طول ما ف حياتك ملل . وعصايه صغيره ماسكها وفِكرك كده هتهش بيها الغَنم .. أو حتي تحميها من كلاب سعرانه غلبانه تايهة ف شوارع من عدم .
وف إشارتك فيه تكدُس مروري مع إن مفيهاش مَلِك ولا حرس جمهوري .. بتحاول تنظمه إنت بإشاراتك متجاهل إشارات الناس.
فيه إشاره خضرا لناس مروا ف يوم من هنا .. بيعدوا منها بسرعه مفيهاش شكله , وإشاره صفرا لناس واقفه مابين أمرين " مصلحه " يمكن دفعتهم يقفولك ثانيتين , وإشاره حمرا لناس عدت حدود الأدب .. ساقت فيها وتمادت منفعش فيهم عَتب ..
ومخالفات بقت بالكوم لناس مهمه ف حياتك .. مزهقتش لسه من لومهم لكن -يمكن- همومهم دفعتهم للمخالفه ..
فيها مخالفات بسيطه .. نسيان ف يوم أو كلمه حتي إتقالت بعد تعب وهموم .. ومنها مخالفات كبيره ,لازم تدفع غرامه ,ومخالفات كتير مليانه وعلي حسب مزاجك .. ياشرطي مرور حياتك .. لك مني تحيه وسلام .. بس سيبني أعدي وأمر مرور كرام ف إشاره خضرا وأنا قابله بعدها علي رصيف أنام...
بس متنساش إنك أنت "واحد " ف إشارات تانيين وهتمر ف يوم ف إشارتي وهتدفع تمن غرامتي غرامتين ..
ليست هناك تعليقات:
إرسال تعليق